సమస్యాపూరణం తిరిగొచ్చింది

రామనాథుడు చెప్పిన యీ సమస్యకి నా పూరణమిది:

శా. ఆమోదాంకితచేల దివ్యహలయుక్తా రేవతీశా సుధీ
రామా రమ్యగుణోజ్జ్వలా శుభములన్ లాభంబులం బొందగా
రామారామవిరామరామశుకశ్రీరావాప్తశ్రోత్రేంద్రియా
రామా రామ పదాబ్జముల్ కొలువరారా కీర్తి మిన్నందురా.

నా చేత చాలా కాలం తర్వాత మళ్ళీ పద్యపదాన్ని పట్టించినందుకు రామనాథునికి కృతజ్ఞతలు.

नववर्षशुभाकांक्षाः

अस्मद्गुरुणा श्री पुल्लेल श्रीकृष्णमूर्तिना वदितः अयं श्लोकः --

पात्रस्खलितवृत्तीनां शास्त्रमार्गानुसारिणाम्।
योगकृत्क्षेमकृत्वस्स्यात् वर्षं श्रीसर्वधारि यत्।।

अन्वयक्रमः --
यत् वर्षं अस्खलितवृत्तीनां पातृ अमार्गानुसारिणां शास्तृ (तत्) श्री सर्वधारि वः योगकृत् क्षेमकृत् स्यात्।

తాత్పర్యం --
ఏ సంవత్సరమైతే చలింపని నడువడిక కలవారికి రక్షకత్వం వహిస్తున్నదో, మంచిమార్గాన్నవలంబించనివారిని శాసిస్తున్నదో (ఆ) సర్వధారి మీకు యోగాన్ని క్షేమాన్ని కలిగించునుగాక.

శివరాత్రి పద్యం

కం. వరమొసగు కరుణను కుసుమ ◊ శరదహన గిరితనయపతి శశధరమౌళీ,
ధరణిజపతినుతవిభవ త్రి ◊ పురభవభయహర లయకర భుజగధర శివా.

గణతంత్రదినపు వేడుక

కం.జననికి భారతమాతకు
వినుతులు గణతంత్రదినపు వేడుకలన్ నీ
తనయులము మేము జేయగ
గని మము ఆశీర్వదించు ఘనతరచరితా.

సంక్రాంతి పద్యం

ఉ.శ్రీరఘువంశమూలపురుషేశ్వరవిష్ణుస్వయంభురూప వో
నీరజబంధు లోకహిత నీరదకారక నిత్యనిర్మలాం
గా రవి నక్రసంక్రమణకాలమునందు శుభంబుగోరుచూ
సూరి దినేశ భాను ఖగ సూర్య సురోత్తమ నిన్నుగొల్చెదన్.

భోగి పద్యం

ఉ.ఆగమవందితానఘుని దాశరథిన్ రఘురామచంద్రునిన్
నాగవిభూషణున్ ప్రళయనర్తనశీలిని శూలినిన్ సిరిన్
శ్రీగణనాథునిన్ మహిత శ్రీలలితాత్రిపురేశ్వరిన్ గుహున్
"భోగి"దినంబునన్ కొలతు భోగిశయున్ సకలాత్మకున్ హరిన్.

తాంబూలం!!!

కం.ఎప్పుడు యెక్కడ పడితే
అప్పుడు అక్కడ కవిత్వ మబ్బాలంటే
తప్పక నోట నమలవలె
కప్పుర తాంబూలమంచు గాఠిగ చెప్తే

కం.చెప్పుచు చక్కని కవితలు
మెప్పింతురొ లేదొ గాని వెధవది దీన్లో
ముప్పేంటంటే అందుకు
అప్పుల పాలౌదురేమొ మన కవులంతా! :P

పరమాత్మస్వరూపం

ఉ.కొందరు అమ్మగా గొలచుకొందురు కొందరు విష్ణుమూర్తిగా
కొందరు రుద్రుడంద్రు మరిగొందరు వారికి తోచినట్లుగా
గందురు నిన్ను రామునిగ గాంచెద మా కులదైవతమ్ముగా
అందరిలోననున్న పరమాత్మస్వరూపమ! మమ్ము బ్రోవుమా.

నా ద్వ్యక్షరీ కందం

ముక్కోటి యేకాదశికి శ్రీమన్నారాయణునికి సమర్పణగా నా ద్వ్యక్షరీ కందం:

కం. మిము మాననమున మీ నా
మమునూ నేమమున నేను మననము మానన్
మమమనమే నీ(మీ) నననీ
నమనమునన్ నమ్మినాను నానానామా.

[मानन = గౌరవము; నేమము = నియమము; मम = నా; నన = పువ్వు; नमन = గౌరవంతో తలవంచుట; నానానామా = పెక్కు పేర్లు కలిగినవాడా]

తెగులు - నివారణ

కం. తెలుగుకి ఆంగ్లం దట్టిం
చి లేతవంకాయకూర చికెనుకెబాబుల్
కలగలిపి తిన్న రీతిని
పలకకపోతె మనభాష అర్థమవదుగా.

ఆ.వె.పంది బురదలోన పొర్లుతూంటేజూచి
ఆహ! బురద యెంతొ హాయిగొలుపు
నంటు దొర్లినాము ఆంగ్లపంకమునందు
పందులం పరాయివారికన్న.

ఆ.వె.వారిభాష నేర్చి వారిసంస్కృతినేర్చి
వొరగబెట్టెదేన్ని? ఓరి శుంఠ!
వారిమాయలోన దూరి పరాయివై
పోయినావు నీవు పూర్తిగాను.

తే.గీ.అమ్మవంటి భాషనెటుల వదలినావు
మేలుకొనుము నీవిపుడైన మేలుసేయ
లేకపోయినచో నీకులేదు ముక్తి
కనుక సేవచేయ నడుముకట్టు యిపుడు.